Þegar gervigreindin tekur stjórnina á netinu

Hin árlega Mobile World Congress ráðstefna í Barselóna fór fram í byrjun mars, en þar var kynnt það nýjasta í tækniþróun fjarskipta. Í ár var gervigreindin í brennidepli sem aldrei fyrr, en í nýju og veigameira hlutverki en áður hefur sést.

Frá eftirlitshlutverki yfir í virka stjórnun

Hingað til hefur gervigreind í fjarskiptum að mestu verið nýtt til að greina mynstur í netrekstri, greina bilanir og styðja starfsfólk við ákvarðanatöku. Nú stefnir þróunin hins vegar að því að gervigreindin taki beinan þátt í rauntímastjórnun netsins, til dæmis með því að stýra umferð, forgangsraða auðlindum og bregðast tafarlaust við sveiflum í álagi eða truflunum. Gervigreindin er þannig að færast frá því að vera eingöngu eftirlitsaðili yfir í að hafa virka stjórn á fjarskiptanetum. Þetta mun leiða til betri þjónustu, aukins stöðugleika og færri truflana. Þegar netin verða sjálfvirkari og „greindari“ geta þau brugðist hraðar við en áður, sem bætir upplifun notenda, hvort sem um er að ræða símtöl, myndstreymi eða almenna gagnanotkun.

Farnet í skýjunum

Gervigreind gegnir sífellt mikilvægara hlutverki við stjórnun fjarskiptakerfa, ekki síst með þróun á borð við Cloud RAN og sjálfbestandi netkerfa (e. self-optimizing networks). Með Cloud RAN færist vinnslan frá sérhæfðum vélbúnaði yfir í sveigjanlega og hugbúnaðardrifna innviði, sem gerir auðveldara að nýta gervigreind til að stýra umferð, forgangsraða auðlindum og bregðast hratt við breytingum á álagi.

Dæmi um þetta er að Nvidia hefur keypt hlut í Nokia og markaðssett stýrieiningu sem nýtir myndvinnslueiningar (GPU) í stað sérhæfðra rása (ASIC), sem dreifir gervigreind víðar um netið. Ericsson hefur jafnframt sýnt sambærilegan búnað sem styður tækni frá Intel, AMD, Arm og Nvidia. Þessi þróun styður við sjálfbestandi net sem geta fylgst með eigin ástandi, aðlagað sig sjálfbreyttum aðstæðum og þannig bætt bæði afköst, sveigjanleika og rekstrarhagkvæmni.

Vélhundur hannar farskiptanet

Gervigreindin nýtist þó í meira en daglegan rekstur því hana má einnig nýta við sjálfa hönnun fjarskiptaneta. Með sjálfvirkum mælingum, skynjurum og snjallri úrvinnslu gagna er hægt að greina útbreiðslu merkis af meiri nákvæmni og finna bestu staðsetningarnar fyrir búnað. Þetta getur stytt leiðina frá hugmynd að framkvæmd og aukið gæði innleiðingar, sérstaklega við flóknar aðstæður eins og innanhúss í stórum byggingum, samgöngumannvirkjum eða í iðnaðarumhverfi.

Á Mobile World Congress ráðstefnunni sýndu Ericsson og Nokia hvernig nýta má „agentic AI“, til að hámarka uppsetningu á farnetdreifikerfi (RAN), beina umferð og greina bilanir í fjölbirgjaumhverfi án mannlegrar íhlutunar. Nokia sýndi sem dæmi „vélhund” sem gengur um svæði, skannar umhverfið og mælir farsímamerki. Gervigreindarhugbúnaður er svo notaður til að reikna út bestu staðsetningar fyrir senda, útbúa hönnunarskjöl og efnislista.

Þótt hlutverk gervigreindar við rekstur og hönnun fjarskiptakerfa hafi vaxið og þróast er eftirlitshlutverki hennar síður en svo lokið. Tæknin hefur þróast áfram til að nýtast enn betur við rauntímaeftirlit og forvirkt viðhald. Með myndgreiningu og sjálfvirkum skoðunum, til dæmis með notkun dróna, ásamt snjallri greiningu á ástandi búnaðar, er hægt að finna frávik fyrr, bæta öryggi starfsfólks og draga úr viðhaldskostnaði.

Tímamót í fjarskiptum

Fyrir fjarskiptageirann markar hagnýting gervigreindarinnar veruleg tímamót. Net framtíðarinnar verða ekki aðeins hraðari, heldur líka öruggari og greindari. Þau munu geta lært af eigin rekstri, brugðist sjálfvirkt við aðstæðum og stutt við innleiðingu nýrrar tækni, svo sem 5G-Advanced og 6G, sem krefst meiri nákvæmni og sveigjanleika en áður hefur þekkst.

Höfundur er Jósef Þeyr Sigmundsson, vörustjóri farnetsdreifikerfa hjá Mílu.